Inogirasyon Wout Kap-Ayisyen / Labadi a: Administrasyon Moïse -Lafontant an ap bay sektè touristik la bourad


Pòtoprens, samdi 24 fevriye 2018.- Prezidan Repiblik la, Ekselans Jovenel Moïse akonpanye ak Premye Minis lan , Doktè Jack Guy Lafontant inogire twonson wout Kap-Ayisyen / Labadi a, samdi 24 fevriye 2018 la.




Seremoni sa ki fèt nan seksyon kominal « Bande du Nord », sou wout Labadi a, reyalize nan prezans yon delegasyon etranje ki gen nan tèt li, premye Minis « Bahamas » la, anpil Minis nan Gouvènman Ayisyen an, reprezantan Bank Mondyal , palmantè ak lòt Eli Lokal.




Wout tou nèf sa ki fèt gras ak bourad lajan Bank Mondyal, rantre nan kad vizyon Prezidan Jovenel Moïse pou sipòte sektè touristik la, kreye kondisyon pou plis moun vin vizite Labadi , ki se zòn touristik ki atire plis vizitè an Ayiti epi rive konekte tout komin ak sekyon kominal nan peyi a.




Eli nan Nò yo bat bravo pou konstriksyon wout sa , ki se rezilta Karavàn Chanjman an. Yo swete, lajan ki antre a travè anviwon 600.000 touris ki vizite Labadi chak ane a retounen vin fè devlopman nan zòn nan.




Ekselans Jovenel Moïse, pwomèt pou kontinye travay nan lide pou pèmèt sektè touristik la antre plis lajan epi vann yon pi bèl imaj de peyi a, sou sèn entènasyonal la.




Prezans premye minis ak Minis envestisman « Bahamas » la sou wout Labadi a, montre a klè volonte Ekselans Jovenel Moïse, pou mete sit touristik peyi Dayiti yo an valè epi travay pou ogmante kantite touris ki antre nan peyi a chak ane.